កម្មកររោងចក្រកាត់ដេរជីមលីជាង១០០នាក់សន្លប់
ដោយ អ៊ុក សាវបូរី
2011-08-30
កម្មការិនីរោងចក្រកាត់ដេរ ជីមលី (Chimly) ជាង ១០០នាក់ បានសន្លប់ក្នុងកន្លែងធ្វើការ ហើយត្រូវម្ចាស់រោងចក្រដឹកយកទៅសង្គ្រោះនៅអតីតមន្ទីរពេទ្យបង្អែក ស្រុកអង្គស្នួល ខេត្តកណ្ដាល បច្ចុប្បន្នជាមណ្ឌលសុខភាព បែកចាន។ប្រធានមណ្ឌលសុខភាពបែកចាន លោក អ៊ុំ ស៊ីវ៉ុន មានប្រសាសន៍នៅថ្ងៃអង្គារ ទី៣០ ខែសីហា ថា គ្រូពេទ្យបានជួយសង្គ្រោះកម្មការិនីធ្វើការនៅរោងចក្រកាត់ដេរ ជីមលី តាំងពីថ្ងៃសុក្រ សប្ដាហ៍មុន រហូតមកដល់ពេលនេះ។ កម្មការិនីដែលបញ្ជូនមកដល់មណ្ឌលសុខភាព ភាគច្រើនខ្សោយ ខ្លះសន្លប់។
គ្រូពេទ្យបានផ្ដល់អុកស៊ីហ្សែនដើម្បីសម្រួលដង្ហើម និងយកឈាមកម្មការិនីទាំងនោះទៅវិភាគឃើញថា ពួកគេខ្វះជាតិស្ករ ៖ «ព្រឹក មិញចូលច្រើនដែរ ៤០នាក់ជាងដែរ។ ពួកនោះច្រើនតែខ្សោយសុក គេហៅថា សុកបំពង់ឌីសូមិច ឌីសឺមីហ្នឹងណា ព្រោះអីមកដល់មន្ទីរពេទ្យ ក្រុមគ្រូពេទ្យសុករបស់ខ្ញុំជោះឈាមជោះអីមើលទៅ ច្រើនតែកង្វះជាតិស្ករក្នុងឈាម»។
កម្មការិនីមួយរូបដែលបានដឹងខ្លួនក្រោយពីសន្លប់ បានរៀបរាប់ឲ្យដឹងថា ក្រោយពីបរិភោគអាហារថ្ងៃត្រង់រួចពួកគាត់ចូលធ្វើការ ស្រាប់តែវិលមុខថប់ដង្ហើម។
អ្នកស្រីថា អគារធ្វើការក្ដៅខ្លាំង កង្ហារបើកមិនដល់កន្លែងគាត់ដេរផង ហើយមនុស្សដេរក៏ច្រើនផង ឯក្លិនថ្នាំដាក់ក្នុងក្រណាត់សម្រាប់ដេរ ជះក្លិនមកផង មេឃហប់ចង់ភ្លៀងផង គាត់ក៏លែងដឹងខ្លួនតែម្តង ៖ «ដល់ពេលមកព្រឹក ថ្ងៃច័ន្ទហ្នឹង បានដល់ពួកខ្ញុំសន្លប់រាប គរគ្នាតែម្ដង។ សន្លប់នោះសន្លប់ដូចព្រឹកមិញអីហ្នឹង វាអត់មានហេតុការណ៍អីទេ សូម្បីតែសន្តិសុខឈរនៅខាងក្រៅក៏សន្លប់ដែរ»។
កម្មការិនីឈ្មោះ សុខា ឲ្យដឹងថា កាលពីថ្ងៃពុធ សប្ដាហ៍មុន មានកម្មការិនីម្នាក់ត្រូវខ្មោចចូល។ ខ្មោចទាមទាររកសំណែន ព្រោះពេលចិនសែនក្បាលទឹក ថៅកែថ្មីដែលជាជនជាតិហ្វីលីពីន មិនបានសែនខុសពីថៅកែមុន ដែលជាជនជាតិចិន គេសែនរាល់ឆ្នាំ។ ក្រោយរឿងហេតុកើតឡើង ថៅកែថ្មីបានរៀបចំពិធីសែន និងបាននិមន្តព្រះសង្ឃប្រោះព្រំទៀតផង។ ស្រាប់តែនៅថ្ងៃច័ន្ទ និងនៅថ្ងៃអង្គារ បន្តមានកម្មការិនីដឹកមកថែមបន្តបន្ទាប់កំពុងសង្គ្រោះនៅមណ្ឌល សុខភាព។
កម្មការិនីឈ្មោះ សុខា ៖ «ព្រោះក្នុងរោងចក្រក្ដៅ ហើយណាមួយនៅក្នុងរោងចក្រហ្នឹងវាបង្កើតក្រុមដេរច្រើនចង្អៀតនោះ។ ពីមុនតែ ៣០ក្រុមជាង ដល់ពេលឥឡូវ ចូល ៥០ក្រុមជាង បានវាចង្អៀត ស្ទះខ្យល់ ហើយកង្ហារវាអត់សូវត្រជាក់ដូចមុនទេ វាក្ដៅ»។
វិទ្យុអាស៊ីសេរីមិនអាចទំនាក់ទំនងតំណាងរោងចក្រកាត់ដេរ ជីម លី ជម្រាបសួរព័ត៌មានបានឡើយ នៅថ្ងៃអង្គារ ទី៣០ ខែសីហា។
ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុនី មានប្រសាសន៍ថា កង្វះអនាម័យ និងគ្មានខ្យល់អុកស៊ីហ្សែនគ្រប់គ្រាន់ ទើបធ្វើឲ្យកម្មករ កម្មការិនី ដួលសន្លប់ក្នុងរដូវភ្លៀង ដែលអាកាសធាតុហប់ និងក្ដៅនេះ។
លោក ជា មុនី បន្ថែម ៖ «រោងចក្រហ្នឹង គឺមានអគារជាច្រើនតម្រៀបជួរគ្នានៅកន្លែងហ្នឹង។ អ៊ីចឹងអ្វីដែលកម្មករដួលសន្លប់ ដោយសារតែរោងចក្រហ្នឹងប្រហែលជាមិនមានបញ្ចូលខ្យល់ឲ្យបាន ត្រឹមត្រូវ។ ខ្យល់អុកស៊ីហ្សែនបែបមិនបរិបូរទេ ហើយនៅពេលដែលមានភ្លៀងធ្លាក់ខ្លាំងអ៊ីចឹង ក្រោយពីមានភ្លៀងធ្លាក់ទៅគឺក្ដៅ កាលណាក្ដៅផងភ្លៀងផងវាឆួល អ៊ីចឹងបរិស្ថាននៅក្នុងរោងចក្រហ្នឹងវាមិនអំណោយទៀត ធ្វើឲ្យកម្មករ កម្មការិនីនៅរោងចក្រជីមលី ដួលសន្លប់»។
កម្មការិនីទាំងនោះឲ្យដឹងថា ក្នុងរោងចក្រកាត់ដេរ ជីមលី មានកម្មករ និងកម្មការិនីជាង ១ពាន់នាក់កំពុងធ្វើការនៅក្នុងរោងចក្រនោះ។ កម្មការិនីណាដែលគ្រូពេទ្យបានជួយសង្គ្រោះឲ្យដឹងខ្លួនមួយចំនួន បានវិលទៅធ្វើការវិញ ព្រោះខ្លាចថៅកែកាត់ប្រាក់ខែ៕
.jpg)
0 comments:
Post a Comment